5:04 م
Unknown
عايزة تعملى وشك وجسمك فى نص ساعة بس ؟؟؟؟ تعالى :)
يزة تعملى وشك وجسمك فى نص ساعة بس ؟؟؟؟ تعالى :)
حبايبى الفتوكات ...السلام عليكم ورحمة الله وبركاته
النهاردة حبيت افيد العرايس و المتزوجات كمان باستعراض مجموعة السيلك ابيل الخاصة بيا و يمكن هى غالية شوية بس بجد تستاهل كل شلن اتدفع فيها و بجد مش بحتاج اروح مركز تجميل او كوافير و مش باخد اى وقت لما باستخدمها و باكون دايما جاهزة فى كل مناسبة و الحمد لله و يا رب اقدر افيدكم و خصوصا ان ده اول موضوع اشارك فيه بصور على فتكات
طبعا اول صورة اللى فوق دى صورة العلبة على بعضها و مش معنى كده انها مش عملية لان المجموعة ليها جراب صغير شيك بيلمها و مش بتاخد مكان فى شنطتك لو روحتى مصيف او سافرتى او حتى روحتى لمامتك و حبيتى تروقى نفسك هناك
دى بقى مجموعة الحواجب و هى بتسوى طول الحواجب و تظبطها بس انا بصراحة مش باستخدمها عشان بافضل الملقاط و المقص فى التظبيط فدى مش باستخدمها (اوعوا تقولولى اول القصيدة كفر ههههههه استنوا التقل ورا )
دا طبعا الكورد او الفيشة اللى بتتوصل بالسيلك ابيل و لازم تشيليه منها بعد ما تخلصى و تحافظى عليه كل مرة و دى كانت نصيحة الاخ اللى فى التوكيل
دا الجهاز و متركب فيه القطعة الاساسية ودى للذراعين و الساقين فقط و بتخليهم تمام مهما كان الشعر قصير و الجهاز بسرعتين ولما بيشتغل ليه اضاءة عشان تشوفى كويس و فى قطعتين بيركبوا على القطعة دى
واحدة للمبتدئين او اللى بيتألموا او جلدهم حساس و التانية للمتعودين دايما عشان تشيل كل سنتوفة مهما كانت حتى الشعر المدفون
دى القطعة اللى بتخفف الالم و بجد ممتازة كنت باستخدمها فى الاول لحد ما اتعودت على الاستخدام
ودى القطعة بتاعت المحترفين عشان الازالة المثالية لان الجزء الاخضر ده بيوقف كل الشعر المدفون او الصغير و يا سلام على المنظر بعد استخدامها بجد حتلاقى نعومة مفيش بعد كده
دا بالنسبة للذراعين والساقين
القطعة دى بقى يا حلوين زى ما انتو شايفين دى رأس الحلاقة والتقصير و انا باستخدمها عشان اقصر بيها شعر الابط لانه لازم يكون قصير جدا قبل الازالة و الجزء البلاستيك الشفاف ده بيتشال من على الرأس عشان تكون للحلاقة و زى ما انتى عايزة بقى ممكن لو بتتضايقى من النزع فى منطقة الابط ممكن تحلقى على طول و دا اللى باعمله لما اكون مستعجلة و بيبقى تمام
دى شكلها بعد ما شلنا الجزء بتاع التقصير و دى كده باستخدمها فى الحلاقة فى المنطقة الحساسة و بتبقى ممتازة بجد لانى بصراحة جربت السويت وباعرف اعمله وكل حاجة لكن زهقت من قرفها و المها ولقيت ان دى وسيلة سريعة ومش متعبة و مش بتخلى الشعر يطلع بسرعة ولا حاجة و لا بتسمر بجد دا شجعنى ان مخليش الشعر يطول اصلا و بقيت انضفها اول باول و مفيش بعد كده
القطعة دى بقى هى الخاصة بازالة شعر الابطين بعد التقصير بالاداة السابقة و باستخدمها كمان لازالة شعر الوجه كله ما عدا الاجزاء اللى حوالين الحواجب عشان دى مناطق عايزة طبعا دقة عشان الحاجب ميتاكلش و والله و انا باشيل الشعر من وشى بيها لقيت قشر بيطلع مع الشعر مع انى باعمل سكرب لكن تحسى بلمعة و نعومة و نضارة مختلفة خااااالص عن الفتلة وبجد من ساعتها مبقيتش اروح الكوافير لانى لقيتها احسن بكتيييير و مش بتتقل و لا حاجة بالعكس و انا شغالة بيها على طول
دى بقى اصغر و ادق راس فى القطع كلها و هى اصلا للمنطقة الحساسة و البيكينى بس انا زى ما قلتلكم مش باستخدمها فى المنطقة دى لكن دى بقى اللى باكمل بيها المناطق الدقيقة فى الوجه زى الانف و الجبهة و حوالين الحواجب و الحتت الدقيقة كلها و بتبقى بجد ممتازة و مش بتخافى و انتى بتعملى بيها و لا حاجة و بتلاقى فى الاخر نفسك وش كله نااااااااعم زى الحرير و لونه وردى
كده المجموعة خلصت و على فكرة انا باعمل كل اللى قلتهولكم ده فى نص ساعة فقط لا غير لانها مش بتاخد وقت و كمان مش بتوجع زى السويت بالعكس اخف بكتير يعنى حترضى المشغولة بالعيال و اللى معندهاش وقت و اللى مش بتقدر تروح كوافير و كمان اللى مش بتحب تستنى الشعر يطلع عشان تعمله سويت
